Op zun Oudurps èschreeve
Un aore hond…. ?
Geurt zat in de keuken van zun pittoreske huusje, mit un droeve blik voor zun uut te staeren. De oeorzaek hiervan was dat de vieearts hao vastèsteld dat ur voor zun trouwe hond die te ziek was om op zun bieenen te stôô, gêên genezing mêêr was.
Zoeodat Geurt dur in toestemmende dat de vieearts de hond un spuitje gaf om un in te laete slaepen. Geurt hao zun trouwe hond achter in hut hof begraeve mit de gedachte dat hie dan nog bie zun in de buurt was. Geurt was nog steeds niejt dun ouwen die toch mêêsal voor alles in iederieen dichte wel un panklaere oplossing kon bedienke.Hie hao zun eige voorènome om toch mar niejt mêêr an un aore hond te beginnen want op zun leeftied (hie was al in de tachtug) zag un dat allemaele toch eigeluk niejt mêêr zoeo zitte. Mar de stilte om zun heene in hut gemis van zun daegelukse rondjes mit de hond, viele um toch wel earg zwaer.
Deur zun dochter Marja wier Geurt anèraeje om dan mar zóeon klein schoeothongetje te neemen,mar dêêr wouw Geurt niks van weete, want zei un " dan mot je noe mit zoeon buukschuuvertje oover de wegt gôô loape wannieer je un uut mt laete".
De weeken reege dur eige an mekaore mar Geurt bleef droevig,somber in donker voor zun eige uut staere.
Op un aevund wier Geurt deur zun zeune Leen èbeld," pa" zeit un "op internet hewk un adres in Friesland èvonge wêêr ze jonge Duutse dogs te koap an bieje,"Zun gezicht klaerende anpersant op in hie zei" dan gôô mun op hut ende van de weeke dur mar ieen van haele. Dus Geurt wier deur zun zeune 's ochends vroeg opèhaeld om z'oeon ruum 250 km van huus un aore Duutse dog te gôô haelen! Nae un uure of wat rieje kwamme ze op hut opègeeve adres an,hier troffe ze un groeote hongekennel an wêêr de 15 maenden ouwe Duutse dog vurbleef. De hongen konne hier zelf bepaele of ze binne of buute wouwe weeze.Nae dat Geurt € 450,-. betaeld hao konne ze de terugreize mit dur ankoap anvaerde. Nae un paer kêêr èstopt te hewwen om de hond zun behoefte te laete doewen, in wat te late eeten in drinken, kwamme ze teegen dun aevund bie hut huusje van Geurt an. Geurt zei teegen zun zeune we zullen de hond ieerst mar us un halsband an doewe zoeo dat we de hond an de rieme kunne houwe om un uut te laeten.
Mit hieel veel piene in moeite kreege ze eindeluk dun halsband bie de hond om zun nikke,zoeodat Geurt zun nieuwe anwinst an de rieme nog voor de nacht uut zouw kunne laete.
Fienael ofèpeigert kwam Geurt vromme mit de hond in un poging om het dier uut te laeten
(uuteindeluk hao hut bieest nog niks èdae oak). Noe ja, docht Geurt het zal wel un kwestie van tied in wenne weeze. Dus wier de hond in de groeote ruume hongekurf van zun voorganger neer èleid. Vurvolgens docht Geurt hut is al niejt zoeo vroeg mêêr, in vandaege is hut nogal un drukke in vuermoeienden dag èweesd ik gôô oak mar naer beade.
Dun aoren ochend toe Geurt uut beade kwam wist un niejt wat un zag op de keuenvloer (Heugevelt-tegels) lag un flinke hoap uutwearpsels in un groeote donkere plekke op de tegels wees ur op dat de hond dêêr de inhoud van zun blaese èleegd hao, om dan nog mar niejt oover de stank te spreeken die ur in de keuken hieng.
Geurt wist eeven niejt hoe of dat unt hao toet un al die toestanden zag. Goeoje raed is diere docht un.,Uuteindelijk besloot un om dan mar naer zun dochter Marja te bellen. Die zei dat ze onmiddelluk naer zun toe zou komme. Toe deeze binne kwam wist ze dan aok niejt wat ze zag. In dur vaoder zat mit zun haon onger zun hoeod an dun taefel in de hond stong naest zun.
Hut ieerste wat ze zei " vaoder ieerst die rothond naer buuten, oars kunnen mun hieelemaele niks beginne".Dus besloot Geurt om de hond mar in hut geiteweitje op te sluuten.Inmiddels was dochterlief begonne om de bevuulde teegels van de vloer op te raepen in naer buuten te briengen.
Hiernae begon ze mit veel hieet waeter in schoeonmaekmiddels om de teegels schoeone te maeken.De hond die buute in hut weitje opèsloote was bleek hut niejt earg naer zun zin te heawen want hie ging te kêêr as un dolle stier. Dat duurende net zoeo lange toe dat un hut heekje wat in de ofrasterieng zat, èsloopt hao om vurvolgens de kuierlatten te neemen.
Geurt was in alle staeten "oak dat nog" zei un! Nae un zoekactie deur Geurt in Marja wier de hond nae un groeot half uure vromme èvonge. Gelokkug hao un zun halsband nog omme zoeodat Geurt un an de rieme mee naer huus kon neeme, wêêr hie de hond opsloot in hut ouwe koejestalletje.Gelokkug was hut lekker droag in zunnug wêêr zoeodat de schoeone teegels op de hegge konne droage. Voordat Geurt naer beade ging dien aevund, ging un nogus prebeere om de hond uut te laeten. Wat dienk je? Hut was wêêr hut zelfde liedje as dun voregen aevund.Geurt wier as hut waere door de hond vooruuit ètrokke. 't Leek wel of de hond Geurt uutliet. Bekof in zonger dat de hond zun behoefte èdae hao kwamme ze vromme bie hut huus van Geurt. De nacht vurliep dan oak wêêr niejt earg geruusloeos want de hond bleef almar janke blaffe in stommele, zoeodat Geurt ur die nacht mêêrdere maelen uut zun beade most, om te kieken of hie hut de hond soms nog beeter naer zun zin kon maeke, heelaes was dat niejt hut geval.
Nae un nacht wêêrin Geurt eigeluk gêên oage dicht èdae hao vong un de noeodege uutwearpsels van de hond op de vloer van hut koejestalletje, dus ieerst wêêr mar de boel opruume in schoeone maeke.As dit zoeo nog lange deur mot gôô mit die rothond bin ik oover un weeke finael èsloopt docht Geurt bie zun eige.'k Wou wel voor ik weet niet wat da'k die hond noeojt èzieje hao.Mit de koffie kwam Marja om de schoeonmaekwearkzaemheeden van de keukenvloer of te maeken.in trof dur vaoder in un zeer gedeprimêêrde toestand an.
Ze zei "Pa ,dat gôôt hier niejt langer zoeo mit die hond hier want dêêr woor je staepelgek van " In dezelfde vaert pakt ze de tillefoon in belt naer dur broer Leen mit de booschap:
"Leen, mit die anbevole hond van joe gôôt hut van gêên kanten, vaoder woordt ur staepelgek van in ik kan hier de bende opruume die dat bieest achterlaet.Ze zei dan oak: " Leen die hond mot hier weig, wat je dur mit doewt mot je zelf mar weete, mar wannêêr dat bieest hier bie vaoder bluuft raekt un hieele maele oover zun toeren mit alle naore gevolgen vandien". Dun aoren dag kwam Leen opdaege bie zun vaoder. Mar die zei hutzelfde as zun zuster, briengt die hond mar vromme, want hut gôôt niejt hier mit dat bieest.
Dus wier de Duutse Dog wêêr bie Leen in de auto èzet (deeze kêêr ging Guert niejt mee)
in vurtrok Leen mit de hond om un dan nae 250 km wêêr bie de kennel vromme te briengen.
Ongerweege bellende Leen naer de hongekennel om te zeaggen dat hie de hond die ze un paer daegen èlee waere weeze haele vromme kwam brienge. De reaksie an de aore kant van de lijn was niejt earg toeschieteluk, want hut is zoeo mit dien handel: geen gezeur, geransie toet de deure. Hoe dan oak, Leen brocht de hond toch vromme. Mit veel piene in moeite kon hie de hond dan toch achter laete. Mar geld vromme? "nie jente krenten" geef je bankno. mar, dan zulle we hut geld wel naer je oover maeke.
Het hieele gebeuren is inmiddels al weer un hieelen tied èlee, in hoewel de rust bie Geurt in huus wêêr vromme is, heit Geurt heeden tun daege nog gieen cent op zun reekenieng èzieje van de hongekennel uut Friesland.
Zoeodoende bluuft ur toch nog un vurveelend vuul naesmaekje an hut Friese honge aevuntruur hange.
Ps. Joele zulle wel begriepe dat de naemen om privacyreden bewust vuranderd binne.
Melissant, winter 2016
De groewten van Job van Klaos van Job Padmos & Gerda van Koos van Gurp.