Un daegje naer Utrecht mit hut openbaer vurvoer…!
Om de vieertien daegen hael ik al jaeren in Dirksland op de Straetdiek bie goudsmid Swemmer hut Oud Rotterdammertje op, want dieer stôô nog al us leuke diengen in. Zoeoas ongerlesten un artiekul oover de veiling ZHE in Rotterdam wieer wiele mieer dan fieerteg jaer un deepo van èhaod hewwe.In zoeo binne dur nog wel diengen wieer of dat je herrinneringen van vroeger an heit. In hut leste Oud Rotterdammertje van dit jaer stong ur un berichtje in, dat ur in hut Nederlans Volksbuurtmuseum in Utrecht un ekspoziesi was oover Arremoei in de jaeren 1920 die ekspoziesi liep ieenundertug december twintugvuuftiejn of.
As je dur nog naertoe zouw wille most je gaouw weeze. We besloote dan om dertug december (ze gave voor dien dag goewd weer op), dan mar us un daegje naer Utrecht te gôôn. We hao dur gieen trek ik om mit de auto hieelemaele naer Utrecht te riejen, mar de auto in Rotterdam Overschie wieer Arina van uus weunt nieer te zetten.om dan vandieer mit dun bus naar Rotterdam-Centraal te gôôn.
Om elf uure stonge we in Overschie op bus driejenderteg te wachten. Op hut bord stong dat un oover zes menuten zouw kommen, wat oak hut geval was.
Mar hie stoppende gieen ieens want dun bus zat stampvol mit passazijiers die ur op hut beginpunt Vliegveld Zestienhoven ( Rottterdam The Hague Airport ) waere inèstept mit de noeoduge begaosie bie dur. De volgende bus van tien menuten laeter dee hutzelfde, 'k zeage: "dat schiet lekker op zoeo". Toe kwam bus nommer drieje die stoppunde mit veel piene in moeite konne we dan toch mee.We stonge dan oak as haeringen in un tunne mar ja we reeje ,op pad naer dun trein, stief naest mun stong un vrouwe die mit dur tillefoon de RET stong te bellen om dur beklag oover de gang van zaeken te doewen, ze was zeeker van gedachten dat dat zouw helpe. Hoe dan oak, toe we op Rotterdam-Centraal an kwamme ree dun trein van zeeven oover twelve net voor uus neuze weig. Dan mar wachte op de volgende trein van twintug oover twelve.
Die kwam netjes op tied an in wiele un plekkie uut èzocht we zatte goewd in wel oe ur omme èroope wier: "dames en heren wilt u deze trein verlaten in verband met een aanrijding met een persoon bij station Rotterdam-Noord. Hierdoor is er geen treinverkeer mogelijk tussen Rotterdam en Gouda. U moet gebruik maken van een om leidingsroute richting Utrecht"
Dieer stôô je dan, wat noe? Via Schiphol of Amsterdam? Gieen van de NS meedewearkers die of hut wist. Uuteindelijk konden we dan mit een Sprinter naer Dun Haege CS om dieer dan in un trein naer Utrecht te steppen. Toe de Sprinter in Dun Haege CS an kwam hao mun mar twiee menuten om oover te steppen van spoor twiee naer spoor vuuve. Deeze reize vurliep wonderwel zonger incidenten, in we troffe dezelfde vrouwe wieer we in dun bus van Overschie naer Rotterdam CS klem naest èstôô hao, zoeodat we un gezellig praetje ongerweege hao in ongemerkt dan toch nog gauw in Utrecht waere.
Al mit al was ut inmiddels tegen twieeje woore ieer dat we bie hut Volksbuurtmeuseun an kwamme.
Ieerst kreege we un film te ziejen hoe of Utrecht ontstôô is deur de jaeren heene.
De bedoeling was dat je deur un steegje heene ging wieer kleine huusjes stonge.
Je kon die huusjes in zoeodat zag hoe of dat de meansen anno 1920 veel al in aeremoewe van un paer centen mar rond moste zien te kommen. Hut ieerste huusje wieer we naer binnen ginge zagge we un kind mit un bieer op dur schoeot zitte ( un poppe ), zie de footo .Wannieer je gieng zitte begon u run bandje wieer op hut kind dan zei dat dur moewder ziek in de bestee lag, in dat ze eigeljk gieen geld hoa om eeten te koapen in dat ze kouwe leeje. Al mit al was hut daegeluks tobbe om de endjes an mekoare te knoapen. Want in dien tied hao je voor un huusgezin van vuuf persoonen om te kunnen leeven toch zeeker 14 gulden in un weeke nodug, dieer zat de huushuure dan wel bie in.
Toe mun an de rondgang deur hut museum begonne, kreege we un beursje mit nepgeld mee om dan nae hut beedelvurhael van de beweuners in de schaemele huusjes, un munt in hut busje goeojen wat op dun taefel stong.
Wieer neae ze dan vriendeluk dee bedanke voor de gift. In zoeo gienge we hut hieel straatje of.
Toe mun allus in hut museum bekeke hao, liepe we in ut centrum van Utrecht nog eeven oover de mart die ur vlak bie was,om dan in de HEMA nog un bakje koffie mit wat ur bie te doewen. Gienge we via Hoog Catharijne richting dun trein dieer an èkomme, bleek dat de treinen wieer normaal waere gôô rieje naer Rotterdam. We troffe hut want de trein stong al klaer, we steppende dur in in anpersant gienge de deuren dicht in gieng un rieje.
Net eeven buuten Utrecht gien de gang dur uut in reeje we mit un slakkegang, we stonge eigeluk nog net niet stille. Wat is ur noe wieer gôônde? dochte we. Hut bleek dat ur hulpverlieeners langs de spoorbaene liepe, mar ja dan weet je nog niks. Toe mun in de buurte van Rotterdam CS kwamme gienge we dan toch wel harder rieje in wier ur omme èroeope dat ur zwaenen op in naest de reels liepe. An èkomme op Rotterdam CS liepe we wieer naer de halte van bus drieunderteg. Nae un menute of wat wachte zatte we in un veel minder vollen bus driejenderteg as 's ochtens in zonder dat mun hut ofèsprooke hao troffen we wieer die zelfde vrouwe die 's ochtens klem naest mun in dun bus èstôô hao, in die mun laeter in dun trein troffe. Hoe is't toch meugeluk?
Zoeo zieje mar, un daegje uut in je komt op plekken wieer je niejt van plan was heene te gôôn in je beleeft diengen wieer of dat je gieen weet van heit.
Zoo bliekt dan weer dat reize mit hut OV anno 2015 nog altied nog un reize om de weareld in tied kan weeze, ondanks alle technieken die ur teegenwoordeg binne.
Melissant, 01 jannewaori 2016
De groewten in als nog veel heil in zegen voor 2016 van Job van Klaos van Job & Gerda van Koos van Gurp. Padmos