Wat wil joe laeter woore?
'n Zôôgenaemde daome van stand vroog ôôit an m'n, ik was bie m'n tante gelaof ik, in ik mot 'n jaer of vuuve eweest hè: 'Wat wil joe laeter woore?' 'Ik lêêre voor rieke lui', hè 'k toe 'eantwoord. Dat leken m'n wel fijn as ie j' alles kon kaope waj' woe. Mit die opleidieng is 't jammer genoeg nôôit wat 'ewoore.
Ik koos uuteindelijk voor 't ongerwies. Om kinders diengen te lêêrene die je zelf leuk vong, dat leek m'n wel wat. Bovendiejn sprakke de lange vekansies m'n hêêl èrg an. Laeter kreeg ik zelfs beroepsmaetig te maekene mit beroepskeuze. De leste elf jaeren was ik schooldecaan van de havo in 't vwo. Wat maekt noe dat je kiejst wat je wil woore? Dat kan van alles weze: bevoorbeeld veel verdiejne, de spannieng van 'n vak, 't leuke van 'n bepaeld beroep, da j' mènsen wil helpe of 'n boeiend technisch vak wil lêêre. Dat kon aok per leeftied verschille. Zôô woe veel jonges in de brugklasse bie de pliesie of 'in t leger. Aok woe d'r wel veel brandweerman woore, in ielk geval spannende beroepen. Wêêrom wil ie bie de brandweer? De psychiater Sigmund Freud heit dêêr ôôit verklaeriengen voor 'egeve: een brandweerman is eigelek 'n gesublimeerde pyromaan. Ik vinde 't 'n raore verklaering in ik gelaove d'r niks van. 't Is mêêr de spannieng in de uutdaegieng d'rvan of goeie voorbeelden: je vaoder of 'n goeie kennis.
Begin jaeren zestig kwam d'r in Ouddurp 'n jeugdbrandweer. 't Was vooral 'n idee van Nees Brêên in Jaop van Leun van Koppen, zôô hè 'k m'n eige laete vertelle. Heule woe 'n kweekviever voor aanwas van de vriewillige brandweer. In 1948 was die in Ouddurp op'ericht. 't Spelende z'n eige allemaele of in in rond de kêrktoren. Onger in d'n toren stieng toch al vanouds een brandspuite. De êêrste gevangeniscel wier de clubruumte in toet d'r in 1951 'n môôie nieuwe witte brandweerauto kwam, wier die onger in d'n toren 'estald. 't Was dêêr wel te kleine, mar gêên nôôd, d'r wier geweun 'n hok tegenan 'ebouwd, zôôdat 't passende.
Ik zou je d'r nog veel mêêr over kunne vertelle, mar omdat de krante kleiner 'ewoore is, mot ik 100 woorden minder, 400 noe mar. Je mot in de zeumere mar 's 'n rondleidieng mit m'n volge, dan hôôr ie mêêr.
Trouwens, de jonges op de foto binne van 'n laetere generaosie.
Reacties: www.dialect.hetnet.nl