Bejaerde aan den bal
Op deze foto zieje ik bliejmoewdige mènsen die mit 'n bal bezig binne. As ik goewd kieke binne 't bejaerde, die an 't koersballene binne. Zôô hiejt dat toch, as ik teminste niejt bekaojd binne? Die sport is tegenwoordig raezend populair. D'r woore zelfs kampioenschappen in 'eorganiseerd, hè 'k m'n eige laete vertelle.
Noe an mien is 't niejt besteed, want an balspelen, behalve volleybal ooit, hè 'k altied 'n gruwelijken hekel 'ehaod. In an balspelen voor bejaerde al hêêlemaele!
Nu moj niejt dienke dat ik niejt sportief binne. Ik hè zelfs ôôit in 'n vaor verlejen, in m'n kweekschooltied, m'n bevoegdheid 'ehaeld om zelf gymnastiekles te magge gevene. Dat heit toe nog hêêl wat voewten in de aerde 'ehaod in 't durende wel 'n hêêlen dag. Eige oefeniengen leverende 'n zesse op. Twêê lessen mos ie dan nog geve in êên dêêrvan was 'n spel. Welk spel, dat hôôrende je pas 's ochens. Voor mien was 't korfbal in 't wier knudde. De kinders wiste de spelregels beter dan ik, in ik wier geweun uut'ejouwd om m'n onkunde.
De theorie van 't vak heit m'n ered. 'n Moeileke vraeg over kastiebal, heit de deurslag egeeve. De vraeg was zôô ingewikkeld, dat de gekommiteerden d'r zelfs 'n tekening bie most maeke. De vraeg was: is d'n bal noe in of uut as 'n dêêr neerkomt? Ikke mar knikke van ja, ja, mar de de man zei geprikkeld: 'k Vraag het aan jou, in of uit?' Ik snappende d'r niks van in gokkende vastberaeje: 'In.!' 'Uitstekend', zei 'n.
Ik hae 't ehaeld.
Toe 'k êênmael zelf mêêster was gaf ik dus gymnastiek, in dat dee ik mit vèrve! Zôô kon 'k 'n zweefkoprol maeke over 'n bank in dêêrachter nog vuuf geknielde lêêrliengen. In 'n koprol achterover toet handstand, dat maekende mien allemaele niks uut. In in de riengen hieng ik as 'n sierlijke zwaene as voorbeeld voor 'n veugelnistje. Ik was toe geweun nog slank. De vrouwe van 't hoofd hao 't zelfs over 'die magere jongen', as ze 't over mien hao. Aok kastiebal gaf ik enthousiast in 't gors achter 't Haegse Huus in Stellendam. Mar an korfbal hè 'k m'n eige nôôit mêêr 'ewaegd!
Ik woore nog al 's 'evroge om verhaelen in 't Ouddurps te komme vertellen voor bejaerde. Mar as ik 'r dan binne, zieje 'k allemaele leeftiedsgenoten. Zelf voel ik m'n eige hêêlemaele niejt oud. Ik doewe nog van alles in nog wat in ik hè 't idee dat ik nog wèrke op free-lancebasis.
Dêêrom is 't beter om niejt te sprekene van bejaerde, mar van ouwere. Zôas men aok niejt mêêr spreekt van allêênstôônde, mar van allêêngôônde. Dat lest klienkt veel positiever, want iemend die gôôt laopt altied nog naer 'n toekomst.
Noe nog even over de foto. Van mien magge ze bluuve balle, toetdat ze d'r bie neervalle, mar ik zieje 't m'n eige nog niejt doewe. Wie 't binne in wêêr 't is? Dat is wêêr an joele. Zelf hè 'k gêên flaauw idee. Reacties naer dialect@hetnet.nl.