Mode
Toe ik deze foto zag, docht ik op 't êêrste gezicht: 'Wat mot ik dêêr noe mit? 'n Modeshow!' Ja, zôô'n foto is aok voor mien altied wêêr 'n verrassieng. Mar 't viel mee.
In m'n kinderjaeren was ik hier in huus, want ik weune nog altied in m'n geboortehuus, eigelek altied omgeve deur mode: modeblaen, knippatroanen in lappen stof. Dichte stieng 't naoimesien op d'n taefel. Moewder hao in d'r jonge jaeren bie juffrouw Van Gelder in Goerêê, 'elêêrd voor naoister, coupeuse zou je tegenwoordig zêgge. Juffrouw Van Gelder was de vrouwe van de beurtschipper.
Hoewel ik moewder toe al 'n ouwe vrouwe vong, ze was evenas vaoder van 1903, in ik was 'n achterankommer, hao ze wat mode betreft hêêle moderne opvattiengen. Ze was 'eabonneerd op modeblaen, zôôas de Marion in vaorder keek ze in de Libelle of in de Eva of d'r aok môôie patrônen instienge. Ze fabricerende mêêstal klêren, die vooruutliejpe op de gangbaere Ouddurpse mode. Zôô maekende ze voor mien soms klêren wêêr ik om 'epest wier.
Behalve naoie, dee ze ook graeg breie. Zôô kon ze uut d'r hôôd 'n Ouddurpse visserstrui breie voor 'n noam van d'r. Ik mocht dan altied op 'n rond stikkie karton mit 'n stopnaelde de balle'ies maeke voor 't de uuteinden van 't halskoordje. D'r kwam oak regelmaetig 'n catalogus voor breiwolle van 't merk De drie Suises, uit te spreken als Swiezes (Zwitsers). De Ouddurpers hao 't dan altied over wolle van de driej suisjes. 'n Buurvrouwe hao 't zelfs over de driej zusjes.
In de wintere droog je op je hôôd altied wat tegen de kouwe: 'n gebreide muste, 'n baret of 'n pet. Lange hè ik 'n baret edroge. Sommige jonges trokke die hêlemael toet over over d'r ôren. Dat was gêên gezicht! Ik droog 'n altied as 'n soldaot. Op 'n gegeve moment droge haest alle jonges 'n pet, mit 'n randje van imitatiebont. Zô'n pet ko je bie Keetje Mastenbroek kaope. Die verkocht hoewen in petten, maar je kon d'r onger aore aok terechte voor 'n klosse twien (garen) of 'n kaertje brad (stopgaren).
Op 'n kêêr heit moewder voor mien uut zôô'n blad zelf 'n pet 'emaekt, netuurlek ofwiekend van de Ouddurpse mode van dat moment. Ik hè 'n mar éên zaeterdagmiddeg op'ehaod, want van alle kanten klonk 't: 'Wat 'n pet! Wat 'n pet!' Haest alles wier bie uus zelf 'emaekt. Nêê, de manefacturewienkels hè weinig an uus verdiejnd. Ja, wat mode betreft, ko j' moewder niks wiesmaeke. Oôit hè 'k zelf wel 's 'n 'n roazen broek ekocht bie C&A. An d'r opmèrkieng: 'Is 't je kleure wel?' wist ie altied wel hoe laete 't was. Ik hè 'n dan oak niejt lange 'edroge.
Noe nog even over de foto. Je kan duudelek zieje dat 't amateurmannequins binne: ze kieke niejt sachrijnig in oak zieje ze d'r niejt uut as 'n anorexiapatiënten.
Ik hè wel 'n vermoewden wie 't binne. Wêêr 't is? Dat is allemaele an joele. Reacties graeg naar dialect@hetnet.nl.