Naer schoole in Menheersen
Noe bin 'k al nege jaer mit pensioewn, nae 'n ongerwieslaopbaene van haest vêêrtig jaer, mar dat gevoewl hè 'k altied nog zôô tegen 't ende van augustus: dat de vakansie verbie is. Ik zag d'r altied wêêr tegenop om te beginnene. Zou 'k ze wêêr ankunne, die nieuwe klassen?
Dat gevoewl was nae de zeumervakansie van 1958 wel aors. Ik zou mit d'n bus nae 'n nieuwe schoole in Menheersen gôô, de HBS. Ik hao d'r hêêl veel zin in, in ik kon't haest niejt mêêr verdure. Ik was al 'n kêêr in de vakansie op de fiets nae Menheersen eweest om schoolspullen te koapene in netuurlik aok 'n degelijke schoolagenda. Aok 'n maendkaerte voor d'n bus hao 'k al an'eschaft op station van Ouddurp. Dat kostende toe tiejn gulden in de maend.
Begin september was 't zôôvaorde. 't Was om half achte altied 'n hêêle drukte op 't tramstation in Ouddurp. Dêêr kwamme de donkerrôôje/buttergele bussen van de RTM. D'r ontstieng dan 'n grôôt gekriejm (gedrang), want iederêên wou 'n goewd plekkie bemachtige. Op 't station van Menheersen kwamme zôô tegen half negene de bussen van t hêêle eiland bie mekaore. Op 'n geve moment gienge d'r aok bussen rieje mit 'n anhanger. Dêêr was dan 'n conductrice aan boord in 't grieze uniform van de RTM. Laeter reeje d'r aok van die lange 'harmonicabussen'.
In die anhangers gieng 't 'r soms hêêl baldaodig an toe. Dan gienge d'r jonges in 't middenpad op ''n rije stôô in die bewoge dan mit kracht heen in weer, zôôdat d'n anhanger gieng sliengere. De conductrice most 't mar toelaete, want heur kon die rotjonges niejt an. De chauffeur stoppende soms in sprak die jonges an op d'r gedrag.'t Is zelfs 'n kêêr ebeurd dat 'n d'r tussen Melissant in Stellendam 'n paer uut'ezet heit. Die konne dan gôô lifte!
Op de HBS vong ik 't mêêstal hêêl leuk. Je hao ielk uure 'n aore lêraer, 'n kittigen, of 'n minder kittigen. As ie 'n leuke lêraer hao, dan vong ie 't vak aok wel leuk. Nederlans vong ik vrêselijk! Ik hê toe m'n eige niejt kunnen voorstelle, dat ik dat ôôit nog 's zou gôô studere. Aardrijkskunde vong 'k aok niks an, mar dat zal wel an de juffrouw elege hê.
's Weunsdaegsmiddegs hao je vrie, mar je most dan wel op zaeterdagochtend nae schoole. D'n bus ree om de twêê uren. Je most dan lange wachte in op zaeterdag was ie dan pas om half twêê wêêr in Ouddurp.
Tussen de middeg deeje m'n in de zeumer uus brôôd op'ete an d'n tramdiek bie schoole. Déér ree soms nog 'n goederetram nae 't Menheersense hôôd over. D'n tram was op 't eiland al in 1956 estopt. Nae de ramp waere de rails te slecht. We atte oak wel op terras van 't café van Mina. In dat café hê 'k ôôit m'n êêrste zakkie chips ekocht, dat was toe nieuw. Dêêr zat dan 'n klein blaeuw zakkie in met zout. Wat 'n teleurstellieng as t'r soms niejt in zat!