VOEWBAL
Noe zal ik mar gelieke mit de deure in huus valle: mit balsporten hè 'k niejt veel, in mit voewbal eigelijk hêlemaele niks. Toch hè 'k ôôit wel 's 'n verhael 'eschreve over m'n êêrste ervaeriengen mit voewbal. 't Stôôt zelfs op 'n cd in bie mêêrdere gelegenheden hè 'k 't verteld. Dus noe dan mar in 'n beknopte versie.
As 'k op 't natuurgebiejd de Kluistee komme, mot ik d'r altied wêêr an dienke: die zaeterdagmiddeg, noe al zôô 'n zestig jaer elee. 'n Kammerao'ie hao m'n over'ehaeld om naer 'n wedstrijd te gôô kiekene van de Westflakkêêse Boys, zôô hiejtende de Ouddurpse voewbalverênigieng. Vooruutstrevend toe al: 'Westvlakkêêse'!! Van 'n saemenvoegieng was toe nog lange gêên spraeke!
Toe m'n op de Kluistee ankwamme, stienge d'r al 'n haop 'supporters' langs de mit zurg 'etrokke kalklijnen. De spelers waere d'r eige nog an 't verklêêjene. 'n Klêêdkaemer was t'r niejt. Je dee 't geweun onger d'n blôôten hemel, achter de brembossen. Tussen de muuzeôôrties in de zandblaew'ies lagge hier in dêêr staepelties klêêren op 't draoge roege gors. An de doelpaelen waere noe netten espanne. 'n Wonderlijk veld: geweun 'n stik haemêête, wêêr 't êêuwenouwe kèrkepad as 'n geule diagonaol overheene liejp.
De wesstrijd begon. Van 't spel begreep 'k niejt veel. Ik was netuurlik voor die van uus. Die hao rôôdwit gestrêêpte hemden an, in zwarte broeken, wêêrvan de puupen toet op d'r spierwitte kniejen hienge. De tegenstanders hao 't veld tegen: soms straopende d'n bal in 'n kuule mit laoi zand, of gieng de aore kant uut as 'n tegen 'n bult op 't veld an kwam. Soms beurende 't dat 'r 'n speler tegen de vlakte gieng as 'n struukelende over 'n bosje ruugte.
Op 'n gegeve moment beurende d'r voor mien gevoewl wat raors: Nae 'n snèrpend flui'ie van de scheidsrechter gienge haest alle spelers naer de helft voor 't doel van uus. Drieje van uus gienge naest mekaore voor 't doel stôô. "Ze gôô 'n penáltie neme", lei m'm kamerao'ie uut. Uuze kieper stieng in uuterste concentraosie eboge voor z'n doel. D'n bal wier neer'eleid, in êên van de aore ploeg nam 'n anlaop, in schoot. D'n bal gien raekeliengs langs de paele in kwam in de braemen terechte. Gelokkig mar!
Vlak voor 't einde bleek 't nog even mis te gôôn. De tegenspelers kwamme gevaerlek duchte nae voren. Flui'ie van de scheidsrechter snèrpende inêêns wêêr; iederêên bleef stôô. De supporters van de tegenpartij begonne harde te joelene. Wat was 't 'r noe wêêr?
Allemaele keke ze nae 'n boer, die mit 'n koeje an 'n touwe rustig an kwam steppe over 't kèrkepad, midden over 't veld. Meschien op pad naer de stier van Dirk Voogd? De wesstrijd wier net zôô lange stille'eleid toetdat ze d'r over heene waere.
Dêêrnae is 't niks mêêr ewoore. Wiele wonge!
Pau Heerschap
Ps. De foto is gemaakt rond 1960, het team is van Voetbalvereniging Flakkee in Middelharnis. Staand v.l.n.r.: A. Visser, C. Jongejan, P. Kievit, P. van der Gijze, J. Groenendijk en R. Campfens. Zittend v.l.n.r.: B. de Blok, W. van der Velde, L. Dubbeld, J. Troost en Van Sliedrecht. Wilt u reageren op deze column? Mail dan naar: dialect@hetnet.nl.