Negosie
Noe binne d'r in Ouddurp nog mar drie kruujeniers mêêr over: de Spar (Accent), Albert Heijn in de Jumbo. Dat was in m'n jeugd, zôô in de jaeren vuuftig van d'n vorigen êêuw, wel aors. As ik even goewd vromme dienke, komme 'k wel op zôô'n zestiejn kruuienierszaeken. Misschien waere 't 'r nog wel mêêr. Gôôt dat zelfs mar 's nae!
In de êêrste plekke hao je de wienkels, allêêne op 't durp telle ik d'r al 'n stik of achte, in de Dirkdoenswegt hao je d'r twêê in an de Haevenwegt aok twêê. D'n mêêst vooruutstrevenden was wel Krien van Harrend (Westhoeve) in de Koolwegt. Die zaek wier in 't begin van de jaeren zestig de êêrste moderne zelfbediejniengswienkel van 't durp.
Behalve die wienkels hao je aok plekken wêêr an huus an negosie edae wier. Naest d'r daegelekse werk, mêêst as landèrrerbeier, proberende 'n antal mènsen in de aevenduren nog wat bie te verdiejnene. Ik dienke dat Krien van Harrend aok zôô begonne is.
Aok vaoder is in z'n vriejen tied, al voor d'n oorlog naest z'n wèrk begonne mit negosie. Mit kaeze in alderlei vis gieng 'n langs de deure. Op 'n gegeve moment gieng 't zôô goewd dat 'n d'r op thuus kon bluuve.'t Assortement breiende z'n eige uut toet 'n complete kruujeniersinventaris.'t Was wel gêên vetpot, mar we konne rondkomme.
Wiele verkocht van alles: klompen in alderlei zaeken voor 't huushouwen. In 't leste hao m'n zelfs'n tabaksvergunnieng, mar de specialiteit bleef kaeze in alderlei soorten vis, zôôas haerienk, bokkienk, stokvis in zoute vis. Lag de voorraed êêrst op zolder, laeter wier d'r 'n magezien in schuure in'ericht, wat 't wienkeltie 'enoemd wier.
Aok van de vreemde (de badgasten) wier 'eprobeerd 'n graen'ie mee te pikkene. Zôô wiere bie d'n tram door sommige ongernemers al foldertjes uut'edêèld om klanten naer d'r wienkel te lokkene. Op 'n gegeve moment gienge d'r zelfs's ochtens mit 'n luxe wienkelwaegen naer 't kampeerterrein. Jaop van Krien van Harrend, die twint an'eslote was bie de Centra, was êên van de êêrste.
't Is leuk om te mèrkene dat m'n stikjes bie 'n foto in Over Flakkee in de smaeke valle. Ik woore d'r nog wel 's op an'esproke. Wie bevoorbeeld die vrouwen waere die an de schôônmaek binne. Ik kon allêêne melde dat die foto in Nieuwe-Tonge 'emaekt is. Van deze foto weet ik nae wat speurwêrk wat mêêr: Achter d'n taefel stôôt Jaop Westhoeve in lienks van z'n z'n blonde hulp Hans Verduun, laeter zelf eigenaer van 'Autobedrijf J. K. Verduijn BV'. Die 'vreemde' kenne ik niejt.
Aok vaoder heit z'n gelok nog 'eperbeerd op 't kampeerterrein. Hie heit dêêrvoor zelfs nog 'n nieuwe waegen an'eschaft: zôô'n iesderen hond mit 'n motor van 3 pk, mar 't wier jammer genoeg niks. De verdiejnsten liejpe achteruut in moewder zei toe:
'Noe kunne m'n twêê diengen doewe: Verhuuze uut deze dôôie lieje (laan) of stoppe.'
Vaoder is toe op Delta gôô wèrke in de bouwpit voor de sluuzen. M'n krege 't dêêrnae goewd: 'n vast lôôn in sociale voorziejniengen.
Pau Heerschap