Naer de Fluppies
Dat was 'n hêêl bizonderen dag, die zaeterdag in 1954, toe t'r in Ouddurp vlakbie de nieuwbouw van de Hermanswegt in de Oôsterwegt 'n speeltuun 'eopend wier. As ie goewd op de foto kiekt, zie je aok veinten van de brandweer laope. Die waere dêêr om de fêêstelijke gebeurtenis in d'r nette pakken luuster bie te zettene. Aok ik hao op die foto kunne stôô, want ik was d'r aok bie. Ik was toe nege jaer.
De mêêste durpen op 't eiland krege nae de Ramp 'n speeltuun. In Ouddurp wier 'n an'eleid an de rand van de Middelduune, vlak voor de stee van de Fluppies, twêê ouwe jonge joons. D'r vaoder hiejtende Flup Meijer, vandêêr de naem Fluppies. De speeltuun heit d'r z'n naem an te dankene, toet op d'n dag van vandaege: 'De Flipjes'.
D'r stienge 'n antal speelwèrktuugen in: touters (schommels), rekstangen, 'n slierbaene, 'n familieschommel, 'n zweefmeule in 'n draoimeule. Noe hao vaoder thuus aok wel 'n touter 'emaekt, mar die was vergeleke mit die van de speeltuun netuurlek niks! Die waere veel haoger. D'r was veel belangstellieng voor, je most in de rije op je beurte wachte, mar op 'n gegeve mement ko j' los gôô. Je zettende vaert om zôô haoge te kommene dà 'j over de stange heene kon kieke. Je kreeg dan 'n gevoel asof ie zwevende.
Ja, in de speeltuun was t'r veel te belevene. Ik gieng d'r dan aok geregeld naer toe, haest ielke zaeterdagmiddeg. D'r waere soms wedstriejen, zôôas koekhappe in zaklaope, op Keuninginnedag bevoorbeeld.
D'r was netuurlek aok toezicht om d'r op te lettene of alles goewd gieng. Jaerenlank heit Piejt Baekelaer dat 'edae. Mar laeter is de naem Eêuwit Taenis voorgoewd an de speeltuun verbonge.
In de jaeren 50 ging ik 's zaeterdaeksochtens altied nae m'n ouwere zuster in de Ouwelansewegt om wat klusjes voor heur te doewene, bv. d'n hil in 'n bepaeld petrôôn anrieve. Op de fiets kwam ik dan langs 't ouwerlek huus van Eêuwit, die altied voor 't raem op bèdde lag. Ik docht dan: 'Wat ziejlig toch, as ie altied ziejk op bèdde mot ligge!'
Dat durende toet d'r nieuwe dokters kwamme. Eêuwit most onmiddellek z'n bèdde uut in revalidere. Hie lêêrende laope in fietse in gieng toet z'n pensioewn wèrke.
Mar op z'n 65e begon z'n carrière pas echt: de speeltuun wier z'n lust in z'n leven, toet z'n 87e! Daegeleks gieng 'n vanuut de Vliedbèrg mit z'n lunchpakket naer z'n 'wèrk'. Hie heit 'r nog 'n lin'ie voor 'ekrege in is zelfs nog verkoze toet 'Vriewilliger van 't jaer'. Uutspraeken van Eêuwit binne als gevleugelde woorden bluuve hange, bv. dezen: "De glijbaan is niet om te laopene, mar om te sliereeeen!!!
De Fluppies is een môôie bestemmieng ewoore voor schoolreisjes in kinderfêêssies. Ik bin d'r gistere nog 's weze kieke. Je kan d'r aok ete in drienke, mar alles was nog dicht.
Op 1 april gôôt de speeltuun wêêr ope, in dat is beslist gêên grap.