Turbineblind?

2 januari 2014, 13:38

Zeit, bin de matjedoors turbineblind geworre
in meegezoge deur de meulenindustrie?
Want, hore ze de burgers hierzo dan nie morre
in hao ze echt gêên aog voor nieuwe energie?

D'r is op dat gebiejd noe toch van aoles gaende
de aolderleste studies binne op de mart
Dat is alom bekend, maar kwa, niettegenstaende
gae heulie hier voor meules, dat is wel ampart

Hao onze leiders aoles uut te nae bekeke
et nieuwe dienken aok terdege bestudeerd
of binne ze voor 't praetje van Den Haeg bezweke
in worre aore opties liejver genegeerd?

In dan, op aore plekken ken et aok hard waoje
allicht mit nóg globaoler anbod van de wind
Mot juust ons eiland voor die meules op gae draoje?
Je vraeg je eige of wie dat zoiejts verzint

Et mot van de provincie, hoor je ammar zègge
As de gemêênte weigert, wiest Zuud-Holland an
Mar mot je blindeliengs je hôôd op taefel lègge
of wil je zèllef komme mit 'n beter plan?

Je ken mit de provincie ommers niet zo grôôze
wanneer je de ervaeriengs in 't verlejen ziejt
Den Haeg heit hierzo al van aoles wille lôôze
wat hoort in 't Rotterdamse industriegebiejd

Noe wille ze dust hier turbineparken brienge
Is dat niet achterhaeld vandaege an d'n dag?
Ik hope dat Flakkee z'n eige niet laet dwienge
in toch meer ziejt in duurzaem as in winstbejag

MAARTJE VAN MELISSANT