Winteraevenden
Soms kwam d'r 'n ome bie uus 'n aeven'ie damme. 't Was vrêêd! 't Zwêêt paerelende dan op z'n veurhôôd in 't èrgste was: je mocht oak niejt praete, want dan kon z'n eige niejt concentrere. Mêêstal verloor 'n dan nae 'n paer uren staere op dat bord oak nog. Ik kon m'n eige hêêlemaele niejt concentrere bie dat soort spelle'ies. Ik hao d'r, geloaf ik, teveel fantasie voor. Dêêrdeur dwaelende m'n gedachten geregeld of. Bie algebra in meetkunde op schoole hao 'k dat oak altied.
Bie de êêrste zin van dit stikje zag ik gelieke voor m'n hoe m'n vroeger onger de lampe allemaele rond d'n taefel zatte: Moewder in m'n twêê zusters zatte te handwèrkene in vaoder mêêstal te lezene. Dat dee ik oak 't liejfste. We lazze oak 'n krante: De Rotterdammer. Naer de radio luustere deeje m'n oak , vooral diejnsdag'saeves as t'r op de Avro 'n amusementsprogramma kwam: 'De bonte Dinsdagavondtrein'. Of naer 'n hôôrspel, zôôas 'De familie Doorsnee'. Vaorder kwam de radio niejt veel an, allêêne voor 't nieuws. Ik hè 't hier over de jaeren vuuftig van d'n vorigen êêuw.
Mit m'n haon iejtewat maeke vong ik oak leuk, zôôas figuurzaege of tekene. Zôô'n figuurzaege hao je dan mit Sinterklaos 'ekrege. Bie de tummerman haelende je dan restjes triplex. Alderleie figuren maekende ik. Mit Sinterklaos hao ik oak 'n paer jaar 'n Mecanodôôze 'ekrege, mar dêêr spelende m'n vaoder mêêr mit as dat ik dat dee.
Toe m'n zuster op 'n kêêr bie femilie in Tholen was weze logere, hao ze voor mien 'n dôôsje mit tubes plakkaatvèrve mee'ebrocht. Noe kon ik de figuren oak kleure. Tekene vong ik oak vrêêd leuk. 'n Schetsboekje hao 'k niejt, mar ik dee 't geweun op de achterkant van blaen van de kalender. Noe kwam oak de plakkaatvèrve hierbie van pas.
Mar 't leukste was toch eigelek leze. Dat dee ik vrêêd graeg. Noe hao 'k mit Sinterklaos op 'n kêêr't boek 'Snuf, de hond' van Piet Prins 'ekrege. Vrêêd môôi was dat. 'k Hè 't mee naer schoole 'enome in de mêêster heit 't in de klasse hêêlemaele voor'eleze. Ja, die Piejt Prins kon vrêêd môôi schrieve in hie hoa van Snuf 'n hêêle serie 'emaekt. Mar ik most toch toet m'n verjaerdag in april wachte vóór ik 'twêêde dêêl kreeg en dan wêêr toet Sinterklaos. Want zôômar 'n boek koape dee je eigelek nôôit. Toe ik laeter zelf mêêster was hè 'k die boeken zelf oak voor'eleze.
Ja, dêêr an d'n taefel onger de lampe is 't allemaele begonne: leze, tekene in schildere. Dat is eigelelek nôôit mêêr op'ehouwe. In Museum Ouddorp is momentêêl 'n kleine tentôônstellieng in'ericht onger de titel: 'Hoe kwamen wij de winteravonden door?' Gôôt dêêr allemaele mar 's kieke!