Gymnastiek
Toe ik op de lêêgere schoole zat hè 'k eigelek mar éên kêêr gymnastiek 'ehaod: in de derde klasse bie mêêster Kleyn, 'n strenge man in 'n driejdêêlig pak in buuten hao 'n altied 'n hoewd op.
't Bizondere is dat ik dat verhael in Griekeland op Rhodos 'eschreve hè.
't Gieng ongeveer als volgt:
Vanof d'n steilen heuvel in de buurte van Rhodos stad zag 'k in de diejpte 't gymnasium ligge.
Toe zag ik inêêns m'n eige wêêr, mêêr dan fuufteg jaer elee, op schoole zitte. 't Was net nae 't speelkwartier, we hao de leien mit veel gekletter al tevoorschien 'ehaeld, dat de mêêster zei:
"Ruim maar weer op, jullie krijgen gymnastiek." Dat vak hao m'n nog nôôit ehaod. Deur de klasse gieng d'r 'n vlaege van opwindieng, mar niejt te èrg, want aors gieng 't niejt deur.
In de schemerige gank, wêêr de geure hieng van honderd jonges die 't 'r op de plee naest edae hao, moste m'n zachies in de rije gôô stôô. In ganzepas gienge m'n deur 't homige 't pomphok, naer 't terrein achter de schoole. In de grond waere dêêr in 't gors twêê haogspriengpaelen 'eslege. Ze waere van mêêster de Lêêuw, die sportief was in aok jaegende. Hie hao ze emaekt van twêê bezemstelen, die 't 'n kretablaeuw 'evèrfd hao. Over spiekerties ko j' 'n touwe steeds haoger lègge. As d'n volgenden sprienge most, gaf de mêêster stijfies 'n knikkie mit z'n hoewd. A 'j 't touwe d'r of espronge hao, mos ie an de kant gôô stôô.
Toe 't op de haogste spiekerties lag, most in zou 'k 't haele! 'k Nam 'k 'n anlaop in spannende m'n spieren toe 't uuterste.
Ik hôôrende bie die paer die 't 'r niejt ofspronge. 't Was de êêrste sportprestatie van m'n leven!
Laeter, toe 'k in Ede op de kweekschoole zat, hê 'k zelf de bevoegdheid 'ehaeld om gym te magge gevene. In dat dee 'k dan oak, toe 'k mêêster was in Sommelsdiek in in Stellendam. Ik kon zelfs 'n zweefkoprol maeke over driej kinders die naest mekaore op d'r kniejen achter 'n bank lagge.
Jaeren waere verbie'evloge. De mêêsters, wêêr 'k 't dêêrnet over hao, waere al lange mit pensioejn.
Die middeg hao 'k in Stellendam op 't gors achter 't Haegse Huus kastiebal egeve.
Toe 'k diejn dag op de fiets langs 't huus van mêêster de Lêêuw ree, viel m'n aoge anêêns op iejtewat bekends: de haogspriengpaelen! De blaeuwe vèrve d'rof 'ebladderd in de spiekerties roewsteg.
Noe stienge ze as steun voor de tomateplanten.