BLOOMEN IN 'T HOF
Iederêên die over Ouddurp riejt zal z'n eige verbaeze over de grôôte lappen grond die vooral achter de ouwere huuzen ligge. 'Wat een megatuinen!' hôôr je de vreemde (toeristen) soms zègge. Mar zôô'n grôôt hof was vroeger nôôdig, dat hè 'k al mêêr kêêren uut'eleid in vorige stikjes. Nôôdig voor de rente in de oflossing van de hypotheek van je huus. In je vriejen tied wiere d'r alderlei tuunbouwproducten op verbouwd. D'r is wat af'ekraauwd in die hoven, 's oches voorda je naer je wèrk gieng in 's aeves toet de schemer inviel.
Oak wiele hao zôô'n grôôt hof, van ruum 2000 vierkant meter. As in 't vroege voorjaer 'espit of 'eploegd was, gienge de selottten in de aerpels d'rin. De aerpels moste ielk jaer op 'n aore plekke, in verband mit aerpelmoewheid, 'n ziejkte. 't Hof wier dêêrom verdêêld in driej gedêêlten. De aerpels schove per jaer 'n stik op. Op 't vriegekomme stik wiere dan selotten 'epoot. Op 't overgebleve stik kwamme dan bloomen voor zaed of bollen. Dat zaed gieng altied op contract. Alderlei soorten bloomen hè m'n 'ehaod, oak 'n paer jaer gladiolen. Van de bloomen voor zaed most je 't zaed plokke. Dat was hêêl aerbeisintensief, vooral 't plokkene van viooltjes. 't Hêêle gezin most helpe. Voordat je dan wat zaed bie mekaore verzaemeld hao! M'n hè m'n oak nog vlijtige liesjes 'ehaod. Dat was hêêlemaele 'n verschrikkieng! As ie die most plokke was 't net asof je vlinders an 't vangene was. De zaen spronge alle kanten uut, as ie niejt oppassende.
In ielk jaer mar hope dat 't zaed genoeg kiejmkracht hao, want aors kreeg ie d'r nik voor.
Gladiolen dus, zôôas je op de foto ziejt. Tegenwoordig zie je oak nog wel velden mit gladiolen, mar vroeger waere 't d'r veel mêêr. Tegenwoordig binne 't tulpen die de velden kleurig versiere. De gladioleteelt hao zôô z'n hoagtepunt in de jaeren zestig in zeventig van de vorigen êêuw. Dat weet ik nog hêêl goewd; ik was vanof 1969 mêêster in Stellendam in ik kennende mènsen die dêêr bie betrokke waere.
Ielk jaar was t'r op 't eiland 'n grôôte tentôônstellieng van alderlei kleurige gladiolen, de zogenaemde 'Floriade'. Die was altied in 'n grôôt gebouw, zôôas de vismijn, mit 'n veelzijdige consumentebeurs d'r omheene. De telers konne mit der gladiolen priezen winne, zôôas ie dat noe nog heit op de jaerlekse Ouddurpse Boerelanddag, mar dan allemaele veel mêêr in 't grôôt.
Kleurige velden mit bloomen voor zaed zie je haest niejt mêêr. Veels te veel wèrk, in weinig opbriengst. De zaedteeltverêênegienge is dêêrom pas'elee op'eheve.
De velden mit die stoere ruiters binne noe verdwene. Ik hè d'r nog veel foto's van om schilderiejen van te maekene. Landschappen mit ruiters: m'n specialiteit. Zôô leve ze allêêne in de verbeeldieng nog voort.
Pau Heerschap
Reacties: pauheerschap@gmail.com