De Blaeuwe Stêên
'n Paer honderd meter ten zuujen van 't Blaeuwe Huus, 't VVV-kantoor in Ouddurp, ligt al êêuwenlank 'n wat mysterieuzen groewnen heuvel, wêêr an 't ènde van d'n dertiejnden êêuw 't kasteel Sprêêuwenstein op e'bouwd is. 't Was in 't begin 't kasteel van de Heren van Zeumerland. Laeter is 't verkocht aan Geraerd, 'n bastaerd van 't Huus van Voorne. 't Was 'n zôôgenaemd Mottekasteel, in 't Frans: Chateau à Motte. Dat betekent niks aors as: kasteel op 'n heuvel. In de loap van de êêuwen is 't kasteel of'ebroke. De grôôte stêênen d'rvan
(klôôstermoppen) binne overal voor gebruukt, onger aore voor de fundering van 't Blaeuwe Huus. Op d'n heuvel graezende altied koeien. Ouddurpens noeme de plekke aok wel de Blaeuwe stêên, omdat d'r in ouwe tiejen recht 'esproke wier op of mit behulp van 'n blaeuwe stêên.
't Is altied 'n wat geheimzinnige plekke 'eweest. D'r is zelfs nog 'n ouwe legende bekend, 'n bee'ie 'n spookverhael. Op d'n heuvel was ôôit 'n boer mit z'n paerd an 't ploegene. Anêêns begint z'n paerd te steigerene in valt de boer z'n oage op wat raors: op de grond binne kleine aerdmanne'ies pannekoekies an 't bakkene. D'n boer lust 'r wel wat van. Hie gôôit z'n jas over de kop van 't paerd in 't woordt rustig. D'n boer buugt z'n eige voorover in griept 'n pannekoekie. Op 't zelfde moment dat 'n d'r 'n hap van neemt, binne zowel hiezelf as de aerdmanne'ies verdwene. Mènsen die d'r langs komme zieje allêêne nog 't paerd stôô mit de jas over z'n kop.
Gloaf je 't? 'Wie 't 't lest vertelt, leeft nog', zeije ze vroeger wel.
Wat heit die foto van dat graefmesien noe hier mit te maekene? Dat za 'k je vertelle. Oak al êêuwenlange wier 't verhael verteld dat vanof de Blaeuwe Stêên 'n ongeraerdse gank zou laope nae de kelder van de Dôôpsgezinde Kèrke in de Weststraete. Dat bleef de gedachten altied mar bezig houwe. Toet d'r 'n antal jaeren 'elee 'n aerdgasleidieng an'eleid wier, binne leden van De Motte, de historische verênigieng die naer dat kasteel 'enoemd is, in 't Smalle Einde gôô kieke of 't graefmesien aok op 'n stêêne gankt zouwe stuite. Niks te ziejene, netuurlek. Dus wier 't verhael van die gank naer 't riek der faobels verweze. Zôô zou d'r in de Voorstraete van Menheersen oak zôô'n gank bestôô hè. D'r wier 'n hond in 'estierd, mar die is helaas nôôit vromme 'ekomme …
Noe is de Blaeuwe Stêên in bezit van Bert Tuk 'ekomme, die d'r grôôtse plannen mit heit. D'r is deur bemiddelieng van De Motte 'n grôôt archeologisch ongerzoek uut'evoerd. 'n Professionêêl bureau heit de plekke uutvoerig bekeke. 't Bliekt 'n hêêl grôôt complex 'eweest te hè'n, dat z'n eige uutstrekkende toet diejn bult in 't Smalle Einde, mit grachten in poortgebouwen. In Museum Ouddorp in 't Raed- in Polderhuus is binnekort 'n maquette van 't mottekasteel te ziejene. Komt dêêr mar 's kieke. Of kuiert over d'n heuvel zelf, want dat mag tegenwoordig oak.
Pau Heerschap
Reacties dialect@hetnet.nl