Wêêr naer strange
Over strange hè 'k al mêêr 'eschreve. Eigelek bin 'k d'r 'n bee'ie over uutverteld, mar hier 'n vrolek plae'ie van een troep nuttige jutters, die 't strange schôône an 't maekene binne. 't Is 'n foto uut 'n krante van zôô'n vêêrtig jaer 'elee. Noe 'k die mènsemassa zôô zieje, mo 'k anêêns dienke an 'n voor mien angstige ervaering, toe 't oak zôô druk op strange was. Ik mot 'n jaer of vuuve 'eweest hè, 't was dienk ik in negentiejnvuuftig van d'n vorigen êêuw. Ik mocht die zaeterdagmiddag mit m'n zuster in 'n nicht van m'n mee naer strange. Noe dee 'k dat altied graeg, want ik hieuw wel van 't waeter, mar die middeg was t'r wat bizonders: 'n demonstraosie van de pas opgerichte reddiengsbrigade. 't Jaer dêêrvoor was t'r 'n dominee mit z'n vrouwe verdronke. Die waere op 'n uutstepje naer Ouddorp mit de meisjesverênigieng. Grôôte consternaosie netuurlek. Burgemêêster Kleijnenberg heit z'n eige toe in'espanne om 'n reddiengsbrigade op te richtene.
De brigade kwam d'r, mar de gemêênteraed was niejt zôô scheutig mit middels. 't Verhael gôôt dat de burgemêêster uut z'n eige zak nog vuufintwintig gulden 'egeve heit om 'n reddingslijn an te kunne schaffene. 't Strange wier noe veiliger. De jongens van de brigade liejpe langs de vloewdlijn in as t'r iemend te vaorde in zêê gieng, wier d'r op 'n toewter 'eblaeze om te waerschoewene. Mar noe mit de demonstraosie wier 't echt serieus.
D'r zwom d'r êên van de brigade hêêl vaorde in zêê, 'k glaove dat 't m'n naemgenoot neef Pauw was. Op 'n gegeve moment riejp 'n harde: 'Help, help!' De aore leden van de brigade kwamme gaauw in actie. Achter mekaore maekende ze 'd'r eige mit 'n zwemgordeltje, dat om d'r middel zat, vast an de lijn die op 'n haspel zat, in zwomme zôô in linie naer de drenkelieng toe. Toe z'n vast hao, wier de haspel wêêr op'ewonge toetdat ze mit de drenkelieng deur de brandieng konne loape.
Ik vong dat allemaele mar hêêlemaele niks! De drenkelieng hiew z'n eige hêêlemael slap, in ik docht dat 'n echt dôôd was. Vooral toe ze 'n mit driej man aok nog gienge draege, z'n voewten op d'n achtersten z'n schoeren, de voorste hieuwe 'n vast mit z'n hôôd naer melêêgen.. 't Spelende z'n eige allemaele of bie strandtente De Zêêster van Jan Flohil. Ik begon te bevene in trok wit weig van benaauwdigheid in raekende zôô van streeke, dat m'n zuster, toet d'r grôôte ongenoegen, zelfs mit m'n naer huus most.
Nae deze dramatische onthulliengen, noch even wat over dat juttene. Echt jutte bestieng in diejn tied eigelek niejt mêêr. D'r spoelende gêên ongerdêêlen mêêr an van vergôône houte schepen. Mêênige schuure of hoewderkot is dêêr vroeger in Ouddorp mit 'ebouwd. Oak hier binne d'r vaeten mit port an'espoeld. In 't strange was vroeger in m'n jeugd altied hêêl schôône, want dêêr was deur de gemêênte 'n persoon voor an'steld, die dêêr op most lette, 'n soort pliesie eigenlek, die oak bekeuriengen uutdêêlende voor te onzedeleke badklêêdieng. Orde most d'r ommers weze!