KEUNIENGINNEDAG?
Wat kon dat nog koud weze op Keuninginnedag! Toe 'k nog mêêster was op Stellendam hè 'k op diejn dag nog dichte mit 'n droppel an m'n neuze op de Voorstraete bie de kinderspelen 'estôô. 'Dat was in de jaeren seventig van de vorigen êêuw. 'Maert roert z'n staert, in april doewt wat 'n wil.' Dat spreekwoord was soms op 30 april hêlemaele van toepassieng. Op deze foto bliekt, zôô an de klêdieng te ziejene, 't mit de temperatuur wel mee te vallene, mar dat waeter zal nog wel vrêêd koud 'eweest hè.
Keunienginnedag. Dat schiejt mien bie 't bekiekene van deze foto te binnen. Zôô te ziejene an de tekst op 't busje mot 't wel in Dirksland 'eweest hè. Die firma zal wel êên van de sponsoren weze, want die is bie 't spektaekel duudelek achter de hegge in beeld gôô stôô. 't Waeterballet 'eïnspireerd op 'n bekend televisieprogramma, zal wel in d'n Boezem 'eweest hè. In Dirksland hè ze altied hêêl veel an Keunieninnedag 'edae. Ze waere dêêr aok altied de êêrste mit 't versieren van 't durp. Ja, ze konne d'r in Dirksland wat van!
Om noe nog even op Stellendam vromme te kommene. Ik hè dêêr 'ewèrkt van 1969 toet 1981 op de Nederlands Hervormde schoole, net gêên 12½ jaer. D'r waere nog twêê lêêgere scholen: d'n openbaeren en de CNS, oak wel de griffemeerde schoole 'enoemd. Die gienge allemaele d'r eige gang, veel contacten waere d'r over 't algemêên niejt. Vooral op keunienginnedag wier d'r broewderlek êêndrachtig saeme'ewèrkt: êêrst de gezaemeleke aubade voor 't huus van de burgemêêster, dan de kinderspelen op de Voorstraete. Dêêrnae gienge m'n uitvoerig borrele bie Kaashoek, noe 't Waepen van Stellendam. In dan 'middegs mit 'n antal collega's naer 't wielrennene in Menheersen, nog ´n bee´ie beneveld.
De mêêst wonderlijke keunienginnedag hè ´k mee´emaekt op m´n êêrste schoole, de School met den Bijbel in Sommelsdiek. D´r hè ´k, geloaf ik, wel ´s mêêr over ´eschreve, mar ik doewe ´t geweun nog ´s. Zôô bizonder! De rivaliteit mit Menheensen was toe nog zôô sterk! In Sommelsdiek hieuwe ze dêêrom keunienginnedag op de verjaardag van prins Bernhard, 29 juni, Prinsjesdag eigelek dus. Eêrst ´n Aubade op ´t Marktveld in dêêrna film in Vita Nova. Kinderspelen waere d´r niejt. Wiele zatte dan reks van middenpad, hêêlemaele oranje ´etôôid vanwege de extreme keuniengsgezindheid van ´t hoofd, de kinders van de openbaere schoole lienks, ongekleurd. Dan saeme kieke naer taoie films over ´t keuniengshuus. In 1981 vertrok ik naer de Prins Maurits. Dêêr was gêên keunienginnedag mêêr, wel ´n dag vrie. Dat was nog nog ´t beste!
Noe bin ´k deur de redactie op m´n viengers ´etikt. Of ik honderd woorden minder kon, dan kon de foto wat grôôter. Dat is noe aok wel nôôdig voor ´n foto mit zoveel personen d´rop. ´t Is noe wel minder, mar honderd is niejt ´elukt.