'n Romeinse haevene
Dat hao 'k m'n eige as zesjaerig jonge'ie niejt kunne voorstelle, dat onger de vlakte richtieng Goerêê nog 'n ouwe stad verburge lag. Die zou pas zeve jaer laeter an de oppervlakte komme.
Ik logerende bie m'n ouste zuster Jans die pas 'etrouwd was. Ze weunende mit d'r man Piejt in de ouwe schoole van d'n Oôstdiek. De weuniengnôôd nae d'n oorlog was grôôt in zôô waere de twêê leegstôônde lokaolen verbouwd toet twêê weuningen. In de lokaolen wier ´n kaemer in ´n slaepkaemer ´emaekt, de rest bleef over as keuken. M´n zuster weunende in ´t voorste lokaol, Piejt Erkelèns mit Anna d´rnaest.
As ik d´r was, sliejp ik in de roakfotuul mit dikke zochte kossens. Die ko j´ uuttrekke in de leunieng neerklappe. Ja, ´t was in d´n tied da j´nog comfotaobel kon gôô ligge roake. As ik op de leunieng gieng stôô, kon ik deur ´t hoage raem nae buuten kieke over ´t land, dat vanof d´n Oôstdiek flaauw ofliejp richtieng Goerêê. Die raemen waere hêêl hoage, want kinders moste in de klasse vooral niejt naer buuten kunne kieke.
In 1958/1959 was d´r in d´n Oôstdiek ´n grôôte ruilverkaeveling. Bie toeval is t´r toe ´n grôôte Romeinse nederzettieng ´evonge, zôô in de buurte ten noorden van de Kleverse wegt. De Zêêuwse archeoloog Jan Trimpe Burger leiende ´t ongerzoek. ´t Betrof ´n Romeinse handelsnederzettieng uut de 1e/2e êêuw nae Chr, die an ´n kanaol mit ´n haevene lag. Veel prachtige aerdewèrkvondsten binne d´r toe an'etroffe. Die krege ´n plekke in ´t Streekmuseum in Sommelsdiek. In 1982 kwam d´r nog ´n anvullend ongerzoek. De vondsten dêêrvan wiere tentôôn´esteld in ´t nieuwe museum in `t Ouddurpse Raed- in Polderhuus. In alletwêê de museums ka j´ die nog bewondere. Gôôt d´r zelf mar ´s kieke. ´t Is de moeite waerd!
In 1978 kwam ik bie De Motte, toe nog de verênigieng van amateurarcheologen voor Goerêê-Overflakkêê. Die dee niejt allêêne opgraeve, mar ook historische verkenniengen op aore menieren. Zôô wier in 1977 begonne mit veldverkenniengen. Mit ´n groepje mènsen wiere alle akkers of´espeurd op verkleuriengen in de anwezigheid van schêrven. Alles wier dan nauwkeurig ´enoteerd. ´t Gieng allemaele mit toestemmieng van van de eigenaers in natuurlek in d´n tied as de gewassen van ´t land waere. Op de foto zie je die veldverkenners an ´t wèrk. Dankzij de naauwkeurige registraties van De Motte kon ik achterhaele wat d´r an de hand was. In februaori 1984 was ´t echt raek. Op ´n percêêl an de Jilleswegt wiere hêêl wat Romeinse schèrven ´evonge. D´r wier zelfs beslote om op 27 febreaori ´n proefsleufje te graevene. Hier zie je Niek van Doorn in Hans Klepper an ´t wèrk. Prachtige schèrven van rôôd in zwart aerdewèrk, mit môôie motieven d´rop wiere an´etroffe. Oak de deskundig Jan Trimpe Burger wier d´rbie betrokke. Ze dochte zelfs an ´n twêêde Romeinse nederzettieng.
Op de foto van de vorige kêêr mocht ik leuke reacties ontvange. D´n leuksten was van voormaelig dokter Jansen. Zo bliekt de baele gêên strôô, mar hôôi te wezene. Och ´n mènse kan niejt alles wete. De personen binne de helaas in 1990 al overleje Thea van Kees Brêên in daernaest Ingrid Stieber.