Op zun Oudurps èschreeve.
Hut natte naejaer van 1974…. !
Toe ik ongerlesten dieer oover las in hut stikkie dat deur Pauw Heerschap in de bielaege van hut Eilande Nieuws (over Flakkee) èschreeve was , kwamme bie mien de beelden van dien tied anieens wieer voor mun gieest, want wannieer je zoeo'n nat naejaer zelf heid mee èmaekt vurgeet je dat van je leevensdaegen neojt mieer. Hut was zelfs zoeo dat eigeluk ieder wolkje waeter gaf, in je lag hieele daegen mar in de modder te dweilen. Allus most je dur mit de hand uut de grond haele , want mit un roeojer kon je hieelemaele niks beginne. In dan most je nog mar zieje dat de boel zoeoas: oostindiese kers dat was un kompleet rampefonds. Witlofwortels, aerpels in de suukerpeen van hut land of te kriegen, soms deeje dur un middug oover om hoaguut wik wak duuzend kilo op de wegt te kriegen in soms zelfs nog mit twiee trekkers. Wannieer je dan eindeluk op de wegt stong mit je boeltje most je ieerst de wielen schoeonemaeke. Deeje dat niejt kreeg je Huub Boshoven van de polder op je dek. Dan zonk de moewd oak wel us in je schoewen noe ja, eigeluk in je laerzen want op de schoewen wier hut hieelemale niks om je eige te vurplaetsen in die modderzoeoj. Mar je most ur teegen an want we hao eigeluk al te lange èwacht mit de gedachte dat hut wel beeter weer zouw woore , om mit hut handje ' t aerpulriekje in mit de suukerpeespae te beginnen. Iedurieen prebeerende dan oak om ur helpers bie te kriegen wat mar tun dieele lukkende. Zoeo heid de losploeg: Kees van Jaen Grinnewis, Jan van Wullen Klepper, Thomus Hoek, Wullum van Basje Moerkearke, Wullum Kievit, Jan van Aeren Witte in Jan van Maert Hoek, hewe in dien tied nogal wat boeren uut dun brand èhollepe. Uuteindeluk konne hurlie dan oak niejt iedurieen helpe. Zoeodat wiele un beroep deeje op un aore ploeg volk die bestong uut Kommer Vurduun, Piejt van Toon Aoleman, Pouw van Keesje van Pouw Grinnewis, Teun van Dam, Gert van Aodam Aoleman, Gert van Splunter in Hans van Hans, Veeneman, mar die hielp uus wel mieer as hut druk was. Al mit al was hut toch half jannewaori ieer de leste witlofwortels uut de grond waere in thuus in dun Durpswegt an dun hoap lagge. Om toch nog op un fesoewnlukke meniere ut de wind in regen un bakkie te doewen uut de termosflesse in je broeod tussen de middug op te eeten hao mun voor vuuftien gulden een sloopauto èkocht die mun opsleeptouwe achter de trekker mee naer de meet namme ( zie de fotoo ) Op de fotoo kan je oak zieje hoe nat of hut was . Ieen dieng wil ik nog wel kwiet hut naejaer van negentienvierunzeventug was het leste jaer dat ik in de landbouw deurèbrocht hewwe. In gieng ik in juni 1975 op un bedrief in de Botlek wearke mar dat hew'k allus uutvoeruger beschreeve.
Melissan, t najaer 2017
De groewten van Job van Klaos van Job Padmos & Gerda van Koos van Gurp
