Op zun Oudurps èschreeve
Vurwachte we dur niejt te veel van…..?
De Sinterklaos is inmiddels mit zun zwarte, veag-, roet in zeurpiejten wieer naer Spanje vurtrokke. Vol vurwachtieng kloppende uus harte wieer.In? Heit de Sint èbrocht wat je wilde? Meschien heit un je dit jaer ooverèsloeoge! Dat kan nutuurluk oak wel us gebeure. Wieer is dun tied èbleeve dat de meansen mien generaosie ( ik bin van negentienvuufunveertug) as kinders in de jaeren vuuftug mit uuze snotneuzen teegen de ruuten van speelegoeowdwinkel bie Klaosje van de Palmstee stonge te kieken wat of dat je zouw vraege voor Sinterklaos.'k Zal noeojt vurgeete dat ik in dien tied mit mun vaoder mee mocht naer Rotterdam. In dat un mit me bie de etalaazjis van de V&D in de Biejekurf gieng kieke. Dieer stong je je eige te vurgaepen an al die beweegende figuren die ze dieer neer èzet hoa. Om dan nog mar niejt te spreeken oover de elektriesche treinen die dieer langs durpjes in oover burgetjes reeje. Dat vong je buutengeweun moeoij! Want dat zag je op durp niejt mar ja, je kreeg hut oak niejt want dat was te diere. Hut bleef as je marzel hao bie un sukelaodeletter,taoitaoipoppe ,suukerbieest of un mecanodoeoze, Dinky Toy un opwind treintje in voor de meisies un poppe of un serviesje dat was hut dan.Teegenwoordug binne dur gieenieens mieer van die Sinterklaos etalaazjis. In al zouwe ze dur weeze dan gieng de jeugd dur gieen ieens bie kieke,want as hut noe van die wrieftillefoons waere ja dieer zei je wat.
Nae hut Sinterklaos gebeuren breekt de Adventstied an. De advent is de anloaptied naer de Kossemisse. In de adventsperiode bereiden de christenen dur eige voor op hut Kerstfieest wieer op de geboorte van de Heere Jezus woordt herdocht. Steeds mieer in mieer meanssen stôô dieer eigluk gieenieens mieer bie stille, wat of Kerst eigeluk beteekend. Die binne mieer bezug mit de kertsboam, kerstvursiering, kerstkranssen, kerstpeketten, kerstdinee in kerstkudootjes.
Wat vurwachte die dan van de kerst? Binne ze dan sociaal mit mekaore bezug?
Gezellug onger mekaore? Gieen bonje mieer? Allus vurgeete in vurgeve?
Noe laete we mekaore nog mar us anspreeke op derde kerstdag. Ik bin benieuwd. Mar laeten we in ieder geval wel eeven prebeere. om dat ouwerwesse Kerstgevoel wieer eeven vromme te kriegen. In dan op de Kerst us un kearkdienst te bezoeke.
An kearken onbreekt hut niejt op us moeije eiland.Dus doewe?
Allen Gezegende Kerstdaegen in un gezond in voorspoeowdug 2017 toe geweanst Job van Klaos van Job Padmos & Gerda van Koos van Gurp
Melissant dec. 2016