D'r op uut!
't Zal je mar overkomme, 'n pries winne van de ongernemersverênigieng van Dirksland om d'r op uut te gôôn. 't Overkwam deze femilie uut Hèrkiengen. Ja, over deze foto weet ik wel wat mêêr, mar ik zal niejt alles verklappe. We zieje 'n hêêl gezin rond de auto, klaer om 'n weekend deur te gôô briengene in bungelowpark ''t Vennebos'. Vooral die auto is 't middelpunt. Noe mot ik anêêns an m'n zwaeger dienke, die hao wel 'n riejbewies, mar nog gêên auto. Tegenwoordig heit iederêên 'n auto, mar in diejn tied haest gêên mènse.
M'n zuster, die veel ouwer was as ik, hao de leeftied dat ze m'n m'n moewder wel hao kunnen weze. Toe ze nog thuus weunende, dee ze dan oak net of ze 't was. Ze weunende nae d'r trouwen an 't begin van de Ouwelansewegt in Ouddurp. Vanuut de kaemer keek ie zôô op de Haezerswegt. Ze hao toe driej dochters. De ouste waere mar zes en acht jaer jonger as ik. Ze noemende mien dan oak gêên ome. Ik was geweun Pau van opoe.
M'n zwaeger was dol op autoriejene in 's zaeterdaeks zou 'n graeg wel 's 'n daegje wille gôô rieje. Noe weunende in de Haezerswegt Daon'ie Mierop. Die hao wel 'n auto in die dee 'n op de zaeterdag an mènsen verhure. M'n ouste nichtje most dan al vroeg genoeg gôô vraege of 't kon. Bie 'n positief resultaot stak ze in de vaorte d'r hand al op. De thuusbluvers wiste dan dat 't kon, de auto was nog vrie. Stak ze d'r hand niejt op, dan was de teleurstellieng grôôt.
Voor de zaeterdag wier alles klaer 'emaekt: brôôd 'esmaerd in beleid, eierkoeken bie d'n bakker ekocht, 'n paer thermoskannen mit koffie 'evuld, gazeuze in'eslege, wat fruit, liefst van eige teelt. En de paeredeken, nog nae de Ramp 'ekrege, in de koffer 'edae. Zôô was m'n hêêlemaele klaer voor de picknik, die èrgens in d'n lande, langs de kant van de wegt, an 'n diek of in 'n bos 'ehouwe zou woore. Alles wier zelf mee'enome. Commerciële eetgelegenheid kwamme niejt in beeld.
Laeter heit m'n zwaeger 'n twêêdehans Dafje 'ekocht, êêrst 'n griezen, laeter 'n groewnen. De meiden waere d'r zôô verguld mit, dat ze op d'n hil in 't Dafje gienge zitte breie. Aok de broer van m'n zwaeger hao d'r êên, in zôô kwam 't voor dat ze 's zaeterdaeks in kolonne d'r op uit gienge. Die ome hao 'n beter richtiengsgevoel, dus die gieng altied voorop. Soms nog net door 'n oranje stoplicht. De volgers reeje dan geweun deur rôôd, om mekaore niejt kwiet te raekene. Och, m'n keek in diejn tied niejt zôô krap. Behoeftes wiere oak geweun discreet in de natuur 'edae, soms per ongelok boven 'n mierenist.
In Ede zat ik in diejn tied (vanof 1961) bie 'n liejve ouwe vrouwe in de kost. De achtertuun grènzende an de ouwe rijksweg naer Arnhem. As 't môôi weer was zatte de bèrmen zondaeksmiddegs vol mit mènsen, die dekens neer'eleid, windschèrmen in zelfs tent'ies op'ezet hao. Tegenwoordig ku je je eige dat niejt mêêr voorstelle.
Reacties: dialect@hetnet.nl