Naer 't zwembad
Wat voor taferêêl zieje m'n hier? Wat voor dienk vliegt hier deur de locht? Nêê deze kêêr gêên exotisch beeld uut vaore streken, mar geweun 'n duukpoppe.
't Is zaeterdagmiddeg 19 april 1977. An 't prille groewn van de baomen ka j' zieje dat 't voorjaer begonne is. 't Zal nog best wel koud 'eweest hè voor al die kinders in die blôôte lieven. Mar gêên nôôd! 't Waeter van 't buutenbad in Stellendam was verwèrmd. Noe verwèrmd is 'n grôôt woord, mar in ielk geval was de grôôtste kouwe d'rvan of. Want wat kon dat koud weze, as 't bad wêêr opegieng. Dat weet ik nog wel as ik mit de klasse gieng schoolzwemmen. Dat was leuk, 'n uutstepje eigelek. Ik was in diejn tied mêêster an de Hervormde Schoole in Stellendam.
Reks zieje m'n wethouwer Laurens Visser. Tegenwoordig zouwe m'n Visser wethouwer van sport 'enoemd hè, want dat was z'n lust in z'n leven, sport. Wat heit dêêr niejt voor 'edae in de gemêênte Goedereede.
Wete joele wat de naem van die poppe wier? RABO! Visser woe 't zwemongerwies verbetere, mar 't gemêênbestuur hao gêên geld over voor 'n duukpoppe, oak toe al bezuunige!. Toe hè de Rabobanken van Ouddurp in Stellendam 'n 'esponsord. Visser zal oak wel wat mit die banken te maekene 'ehaod hè. D'r was oak 'n pries van 25 gulden beschikbaer voor wie 'n as êêrsten kon opduuke. Danker Peeman was d'n gelokkigen.
Soms dee 'k wel 's meezwemme, mar dan was 't wel juni. We gienge d'r mit de klasse op de fiets naertoe. Dan mos ie nog goewd uutkieke , want as mêêster was ie verantwoordelek. In 't zwembad was 't altied hêêl gezellig, 'n bee'ie helpe, of wat klesse mit badmêêster Snoeij of mit Hochem, de ongerhoudsman. De kinders die niejt konne zwemme moste van die gordeltjes omme mit van de grôôte kurke blokken. Ik hao d'r 'n vein'ie bie die was zôô maeger, dat d'r geweun twêê blokjes over mekaore viele. In dan 't lint d'r nog omhene, rond z'n hêêle middel.
Zelf hè 'k as kind nôôit zwemles 'ehaod. Je dee dat je eige geweun zelf mar lêêre, an strange of op 't zandhoekje bij Preekhil. Zôô kon ik wel zwemme, mar natuurlek niejt goewd. In militaire diejnst in Venlo moste m'n al hêêl vroeg naer 't zwembad, veel te fanatiek voor mien doewene. Ik gieng dan mar geweun bie de Braebantse boerejongens stôô, oak mit 'n kurke gordeltje om m'n lief. En dan die sjersjant maar foetere op die 'onderwijzer' die geeneens kon zwemmen en zich schamen moest.
Ik hè 'ehôôrd dat tegenwoordig 't schoolzwemmene weigbezunigd is. De schooltandarts zeker oak al? Och, 't woordt d'r allemaele niejt beter op.
Reacties: dialect@hetnet.nl.