OP JE KLOMPEN
Vaoder was in de jaeren twintig in dertig van d'n vorigen êêuw boereknecht. 't Was 'n hard bestôôn: vooral in 't voorjaer in in de zeumere most je hêêl vroeg uut je bèdde om naer 't land te gôôn. Eêrst 'n kattewasje, je eige anklêêje, wat ete, in dan reeg je de lange veters van je veldschoewen vast, 'n tiedrovend karwei'ie. Soms ko j' aok op de klompen, as 't niejt te nat was. Die schoot je zôô an, in weig was ie, mit je stikkezak over je schoere.
Vaoder hiew d'rvan om allerlei annekedoten te vertellene. De mêêste hè 'k mêêrdere kêêren 'ehôôrd. Zôô hao 'n d'r aok êên over Kees, 'n ouwe jonge joon. (vrijgezel). Op 'n ochend riejp z'n moewder: 'Kees, d'ruut komme, 't is haoge tied! Je komt nog te laete op 't land!' Kees antwoordende mit 'n slaeperige stemme: 'k Draoje nog even omme, want ik mot vandaege op de klompen!'
Ja, 't was harde wèrkene op 't land, in voor 'n bee'ie geld: in de zeumere nege gulden in de weeke, in in de wintere zesse. Dêêrom dee vaoder bieverdiejne in z'n vriejen tied: tuunbouwproducten uut 't hof verkaope, mar op 'n gegeve moment gieng 'n ook allerlei soorten vis verkaope: haerienk, bokkienk, stokvis in zoute vis. Laeter kwamme dêêr nog alderlei kruujenierswaeren bie. Zôô verkochte m'n op 'n gegeve moment aok klompen, in alderlei soorten in maeten.
't Laopene op klompen valt in 't begin niejt mee, je mot letterlijk mit kromme têên laope. Dat ka j' zieje an mènsen die landelijk binne komme weune. Die perbere aok op klompen te laopene, mar 't is mêêr strompele dan laopene. Noe hè 'k dêêr tegenwoordig aok zelf last van, as ik in klêederdracht laope. As kind kon ik hêêl harde op klompen fekke (hollen). As ie achtervolgd wier, nam ie je klompen geweun in je hand, in zettende je op je kniejkousen de sokken d'rin!
Wiele kochte uuze klompen in bie de firma Weststraete uut Goes in Merien Melissant uit Stellendam, mar je hao op 't durp aok 'n klompemaeker: Wullem de klompemaeker, die ze percies voor je op maete kon maeke. Pas veel laeter wist ik dat 'n Visser hiejtende. In meule De Zwaan in Ouddurp ka j' al z'n gerêêdschappen nog bekieke.
Klompen waere veel goewkaoper as schoewen, mar ze moste toch zôô lange meugelijk meegôô, zelfs as de kappe d'rof vloog! Die wier d'r dan geweun wêêr op'ezet, mit 'n stikkie iesderdraed in 'n paer spiekerties. Of mit zôô'n iezdere band'ie mit van die schèrpe punt'ies. Pas as de zoole verslete was, in de klompe lek 'ewoore was, dan was 't d'r echt mit 'edae. Dat ko j' op je klompen anvoewle, zôôas ze wel zègge.
Reageren? dialect@hetnet.nl